Центарот за Нови Медиуми е идеја која се роди отприлика пред една година. Јадрото на таа организација се двајца магистранти по комуникологија, еден студент по новинарство и еден студент по политологија.

Веќе се навикнав на прозивки од типот на Бунка и Букарски. Сосема фер е да се стави под знак прашалник легитимитетот на еден настан како што е МК Блог Конференцијата. Не им замерувам ниту за тонот со кој се обраќаат.

Овој текст не би требало да претставува некаков „демант“, затоа што авторите, респективно, не изнеле ниту еден аргумент кој би го побивал (во ред, Бунка сепак има структуирана мислам наспроти фрлањето со дрва и камења од страна на Букарски). Сепак, решив да го пишам текстов затоа што се чувствувам должен да одговорам, најмногу поради тоа што се поставуваат прашања, кои мора да бидат итно одговорени.

Мојата реплика кон Бунка:

Блогот не е множество. Еден блог е единка која припаѓа на многу множества. Множествата не се зависни едно од друго бидејќи материјално тие и не постојат. I’m crazy? Блог-конференција?

Блогот е форма. Еден блог сам по себе претставува само неколку килобајти. Функционалноста и влијанието блогот ги црпи од линковите, вмрежувањето, за да стане интегрална единка од мета-заедницата која ја нарекуваме блогосфера. Блог-конференциите, кои се одржуваат насекаде низ светот претставуваат обид за трансцедирање на дигиталниот јаз, т.е. вмрежување во 3-Д. Но, тие понекогаш добиваат и поакадмески облик; кога се разгледуваат односите блогосфера визави други општествени п(р)ојави и учествуваат не само луѓе кои имаат блогови, туку и експерти од различни општествени науки, или пак активисти во цивилното општество. Неодамна се одржа една ваква конференција во регионот, со завиден број учесници, и афирмирани предавачи. Линк: БлогОпен

Единствено независноста е онаа која му го дава животот на блогот. Многу релативно познати светски блогери се “купени” на ваков или сличен начин, но има еден контраефект, животот на таквиот блог умира одненадеж, ништо не може да го спаси…(токму за оваа пишуваа некои македонски блогери, кои се дел од промотивново делување, контрадикција?). Независноста секогаш се контаминира со вакви и слични активности, и без да организаторите се свесни за тоа, а најчесто не се…

Никој никому не ја спори независноста. Но, не можам да спорам дека формалниот облик на дејствување ти дава определена рамка што мора да ја почитуваш, која ете, на некој начин ти поставува лимит до каде може да одиш (ова го говорам од аспект на човек директно инволвиран во организацијата на оваа конференција, и некои други активности вон Центарот за Нови Медиуми). Тоа е цената на неанонимноста на интернет. Да останев Шепард без име и презиме ќе ја имав истата таа слобода што ја има Бунка. „Менаџирање“ на идентитетот и одредување приоритети. Мојот приоритет е делување во пракса. Затоа и ја отфрлив анонимноста; затоа сум активен во повеќе формални, но и неформални организации.

Кој одделува од својот профит за да овозможи постоење на непрофитна организација, која на некој начин сака да ги здружи блогерите?

Очигледно целта на ЦНМ е мисинтерпретирана. Во продолжение следат целите и активностите согласно Статутот на организацијата:

• Промовирање и унапредување на новите медиуми
• Анализа и истражување на новите медиуми
• Поддршка на медиуми со „open content“ кои им овозможуваат на сите граѓани да „бидат медиуми“ и да партиципираат во создавањето на медиумската содржина
• Организација и присуство на трибини, семинари, работилници и други форми на дебата за теми и содржини од областа на новите медиуми
• Промовирање на медиумска едукација како неопходно образование за сите
• Oрганизација на обуки и семинари од едукативен карактер од сферата на новите медиуми
• Oрганизација и реализација на издавачка дејност од областа на новите медиуми: книги, брошури, електронски изданија, прирачници, списанија и слично
• Воспоставување, одржување и развивање на меѓународна соработка со организации, институции и установи со слична или блиска активност и определба со онаа на Центар за нови медиуми

Мојата лична причина за учество во Центарот за Нови Медиуми е тоа што имам амбиции да специјализирам на некоја пост-дипломска програма која ќе го опфаќа односот на политиката и медиумите; сметам дека организација која ќе држи до вакви активности е одлично место за припрема за она што ме чека по дипломирањето. Значи, ЦНМ е многу повеќе од „организација која сака да ги здружи блогерите“, а мојот интерес е многу повеќе од правење кеш или стекнување слава.

* * *

По реакцијата на Бунка, се јави и Алекс Букарски, видно вознемирен од излегувањето на ЦНМ во јавноста. Накусо неговиот пост: „може да се (из)ебете со вашиот нво-активизам. [...] на крај, терајте се слободно у курац!!!“.

Алекс,

За последен пат ќе влетам во лична препирка со тебе: ако ти пречи мојот ангажман вон блогот, тогаш тоа е твој проблем. Твојот аргумент дека сме се „продале“, или дека „ни џитнале проектчиња“, се апсолутно без врска, затоа што нити си прашал за да ти одговорам, нити пак знаеш како функционира организацијата. Воден од предрасудите за невладиниот сектор, ти си тој кој што е конформист и не гледа подалеку од „терањето у пичку матер“ како врвен дострел и најдобар метод за јавно будење. До таа мера си го затворил мозокот, па со таков самобендисан тон викаш „не ти го дадов Бернард Маркс да го копираш“. А сам знаеш дека Бернард Маркс си го купив сам

Инаку, естаблишментот јас сеуште ќе го пердашам. Имам образ за тоа, затоа што никому не сум му седнал в скут, како што ти не знам од каде заклучи (а да, заборавив, НВО у старт е продавање на газот). Тоа што работам активно на катаљон проекти не само за ЦНМ, што волонтерски, што за кеш (да Букарски, замисли, за некои работи што ги правам земам кеш!), он и офф лајн, кажува дека сум успеал да излезам од филмот кој за жал ти упорно го живееш со години – непрестајно серење за се` и сешто на сите страни.

Тврдиш дека сум ги прифатил „новите медиуми“ и со тоа сум се вклопил во системот? Прво, нити знаеш нити имаш идеја што јас правам во „новите медиуми“ и кои ми се намерите (за што веќе кажав во одговорот за Бунка) за да можеш туку така да речеш дека сум се продал. Второ, ти немаш капацитет за да разликуваш материјалистички опортунизам од ентузијазам, а јас и немам желба да ти објаснувам. Трето, кога ќе го надминеш лицемерието према сам себе и ќе си го видиш мешето во огледало, па да си го ставиш во контекст на сопствениот живот „вклопувањето во системот“, би ти се згадила цела твоја кариера сосе паричната награда од Хари Костов, затоа што тоа колку си плукан и отфрлан воопшто не е мерило колку си надвор од системот. И Бојан 13ка е плукан, па му е фино и топличко. А на системот му треба Букарски, за да симулира (без т) „револуција“.
За конференцијата пак, како kick-off настан на ЦНМ, ќе морам да те разочарам со фактот дека е целосно no-budget проект (со НВО речник кажано), и сите поситни трошоци ќе бидат крпено-лепено (се разбира, не ја исклучувам можноста да влета некој помагач, пример обезбедување сокчиња за посетителите или рекламирање на настанот, него замисли помагач еј!). Јас најверојатно ќе учествувам на оваа конференција како воведничар во втората сесија, и ќе ми биде мило ако присуствуваш и земеш активно учествуво во отворената дебата на тема „блоговите и традиционалните медиуми“. Ќе имаш солидна можност да го исперкаш естаблишментот.