Да се аргументира забрана за абортус со прикажување клип од постапката, е тотално глупо. Наместо аргументи и критички ставови, се удира на емоции.
Цел град е излепен со плакати на кои има линк од изведување на абортус. Стварно е гадно.

Ама ништо помалку гадно не е ни ова видео, од породување.

И сеа?! Што е погадно?!

Јас лично сум против абортирање (во случај кога јас би бил засегнат, т.е. би сакал да се роди она што јас би го зачнал). Би сакал деца. Многу деца. Сметам дека се богатство. До пред некое време бев изрично против, но што знам, се сменив многу во тој поглед и сум сигурен дека многу порано од моите врсници ќе станам татко. Не би сакал мој плод да биде абортиран, но и не би инсистирал на раѓање по секоја цена доколку нема услови.
Но тоа не ми дава право да им го одредувам животот на останатите. Правото да се абортира е сосема легитимно, во било која околност, не е битно дали се работи за потенцијални аномалии на плодот, или едноставно прагматична одлука да се избере кариера наспроти мајчинство. Нештото што се абортира не е човек, не е личност, не е душа, само мало топченце кое сеуште функционира како дел од телото на мајката (она со клипот е превара, тоа е абортус во шести месец веројатно). Тоа не е убиство. Тоа е едноставна хирушка интервенција, чин кој што се прави поради тоа проценката дека абортирањето би било покорисно отколку раѓањето. На крајот на краиштата, кога некоја трудна жена не сака да стане мајка, зар треба да ја присилуваме на тоа?

Забранувањето на абортусот за мене би бил тотален нонсенс, повредување на личното право на избор, игнорирање на науката на сметка на некои си догми и голем чекор наназад во поглед на почитувањето на Човекот од страна на законот.

Што се однесува до некои други дискусии поврзани со ова прашање, како на пример “одумирањето на македонската нација” – сметам дека крајно лицемерно и кукавички е да се бара вината за опаднатиот наталитет во абортусите, тоа е само мешање во животите на другите. Сите оние кои се потресени поради намалената стапка на раѓања, само еден совет – ПРАВЕТЕ ДЕЦА МАСОВНО! Ич да не ви е гајле за оние што абортираат. Никогаш тие нема да можат да изабортираат колку што вие можете да изродите. Секогаш тргајте од вас. Македонци, размножувајте се! Оплодете се во името на нацијата!
Доколку пак, постои загриженост за огромната стапка на абортуси (некаде чув 70 дневно, што не е малце) заради самиот чин на абортус, тогаш еден совет: порано спречете, отколку да го лечите. Користете контрацепција. Ако не сакаш деца, а ти се води љубов, се знае што треба. Место да лепите плакати против абортус, делете кондоми. И секако, место веронаука – сексуално образование.